Хөдөлмөр эрхлэх ангиллын виз буюу C виз хэрхэн мэдүүлэх вэ?
Нийтлэгч: Эрх зүйч Т.Мөнхбат
Манай хуулийн фирм нь энэ сараас эхлэн гадаадын хөрөнгө оруулагч болон гадаадын хөрөнгө оруулалттай компаниудад зориулан хэрэгцээтэй, чухал сэдвээр блог бичиж оруулахаар болсныг дуулгахад таатай байна. Анхны блогтоо бид гадаадын иргэн Монгол улсад хөдөлмөр эрхлэн оршин суухад шаардлагатай виз болон оршин суух зөвшөөрлийг хэрхэн авах уу, юунд анхаарах вэ гэдэг талаар мэдээлэл бэлдлээ.
Энэхүү нийтлэл дараах агуулгаас бүрдэнэ.
Хөдөлмөр эрхлэх урьдчилсан зөвшөөрөл буюу Урилга авах
Визийн зөвшөөрөл авах
Виз даруулах
Хөдөлмөр эрхлэх үндсэн зөвшөөрөл авах
Оршин суух зөвшөөрлийн үнэмлэх авах
Зардал
Торгууль
Хөдөлмөр эрхлэн оршин суух үйл явц нь дараах шат дараалалтай байх бөгөөд тус бүрчлэн анхаарах зүйлсийг товч тайлбарлая.
1. Хөдөлмөр эрхлэх урьдчилсан зөвшөөрөл буюу Урилга авах
Монгол улсад хөдөлмөр эрхлэхийн тулд нэн тэргүүнд Ажил олгогч байгууллага нь Монгол Улсын Хөдөлмөр, халамжийн үйлчилгээний ерөнхий газраас Хөдөлмөр эрхлэх урьдчилсан зөвшөөрөл буюу УРИЛГА авах шаардлагатай.
Түүнчлэн Ажиллах хүчний шилжилт хөдөлгөөний тухай хуулийн 23.4-т “Ажил олгогч хөдөлмөр эрхлэлтийн бүртгэл, мэдээллийн санд ажлын байрны зарыг байршуулж, ажилтныг идэвхтэй хайж эхэлснээс хойш ажлын 14 өдрийн дотор дотоодоос ажилтан авч чадаагүй бол гадаад ажилтныг хөдөлмөр эрхлүүлэх урилга хүсэх эрхтэй.” хэмээн заасан шаардлагыг хангасан талаарх мэдээллийг нотлохын тулд хөдөлмөр эрхлэлтийн бүртгэл, мэдээллийн нэгдсэн сан болох https://www.ejob.gov.mn/-д байршуулж, нийтэд мэдээлсэн байх бөгөөд аймаг, дүүргийн Хөдөлмөр, халамжийн үйлчилгээний газар, хэлтсээс тодорхойлолт авах шаардлагагүй болно.
Ингэхдээ Уригч байгууллага нь дараах материалыг бүрдүүлэн цахим хэлбэрээр болон цаасаар өгнө.
Албан хүсэлт /Маягтын дагуу/
Хуулийн этгээдийн улсын бүртгэлийн гэрчилгээний хуулбар
Нийгмийн даатгалын шимтгэл төлөлтийн НД-7 болон НД-8 маягт
Хөдөлмөр эрхлэх гадаад иргэнтэй төрөлх хэл дээр нь байгуулсан Хөдөлмөрийн гэрээ, түүний Монгол хэл дээрх баталгаат орчуулга
Үйлчилгээний хураамж төлсөн баримт
Гадаад иргэний пасспортын хуулбар Мөн бусад шаардлагатай материалууд
Материалыг цахимаар өгөхдөө Гадаадаас ажиллах хүч авах үйлчилгээний зөвшөөрөл олгох цахим систем болох https://avah.hudulmur-halamj.gov.mn/#/ -рүү нэвтрэн орж илгээдэг.
2. Визийн зөвшөөрөл авах
Урилга авсны дараа Гадаадын иргэн, харьяатын газарт хандаж Визийн зөвшөөрөл хүснэ.
Ингэхдээ дараах материалыг бүрдүүлж, зөвхөн цахимаар хүргүүлнэ.
Уригч байгууллагын албан хүсэлт
Хуулийн этгээдийн улсын бүртгэлийн гэрчилгээний хуулбар
Хөдөлмөр, халамжийн үйлчилгээний ерөнхий газраас олгосон урьдчилсан зөвшөөрөл буюу Урилга
Хүсэлт гаргаж буй ажилтанд тухайн байгууллагаас олгосон итгэмжлэх, ажлын газрын үнэмлэх, иргэний үнэмлэх
Хаягийн баталгаажуулалт Мөн бусад шаардлагатай материалууд
Уригч байгууллагын албан хүсэлтэд хөдөлмөр эрхлэх гадаад иргэний Монгол улсад байх хугацаа, виз олгох газар, ажиллах салбарыг зөв дурдахыг онцгойлон анхаарна уу.
Хаягийн баталгаажуулалт дээр дараах зүйлийг анхаарах шаардлагатай. Хэрэв ажилтан түрээсийн байранд байх бол Түрээсийн гэрээг өгөх шаардлагатай. Түрээсийн гэрээнд үл хөдлөх эд хөрөнгийн гэрчилгээг хавсаргасан байна. Үүнээс гадна түрээсийн гэрээнд гадаадын иргэнийг эсхүл уригч байгууллагыг төлөөлж байгууллагын ажилтан эсхүл хэн нэгэн этгээд гарын үсэг зурах бол тухайн этгээдийн хэн болохыг тодорхойлсон баримт, итгэмжлэл зэргийг хавсаргах хэрэгтэй. Мөн тухайн баг, хорооны Засаг даргаас тухайн хаягт гадаадын иргэн нь оршин суугаа талаар тодорхойлолтыг авбал зохистой байна.
Материалыг Гадаадын иргэн, харьяатын газрын цахим систем болох https://isf.mn/mn/service-рүү нэвтрэн орж, өгнө.
3. Виз даруулах
Визийн зөвшөөрөл авсны дараа 60 хоногийн хугацаанд хүчинтэй байх бөгөөд энэ хугацаанд багтаж виз даруулна.
Гадаадын иргэн нь Визийг Гадаад улсад байрлах a) Монгол улсын дипломат төлөөлөгчийн газар, эсхүл b) хилийн боомт эсхүл c) нисэх онгоцны буудал дээр даруулах боломжтой. Хэрэв Виз даруулах газар солигдсон тохиолдолд визийн зөвшөөрлийг дахин мэдүүлэх шаардлагатай тул анхаарна уу.
4. Хөдөлмөр эрхлэх үндсэн зөвшөөрөл
Ингээд гадаадын иргэн нь пасспорт дээрээ хөдөлмөр эрхлэх виз буюу С визийг амжилттай дарууллаа.
Харин одоо ингээд дуусахгүй. Гадаадын иргэн нь Монгол улсын хилээр орж ирснээс хойш ажлын 10 хоногт багтааж, Хөдөлмөр эрхлэх үндсэн зөвшөөрөл авах шаардлагатай.
Үүний тулд Уригч байгууллага нь гадаад ажилтны ажлын байрны төлбөр болох сарын 1,584,000 төгрөгийн төлбөрийг төлсөн байх шаардлагатай. Тухайн ажилтан Монгол Улсад хэдэн сар ажиллах уу, тэр хугацаанд тохируулан төлнө.
Мөн харьяалах дүүрэг, сумын эрүүл мэндийн төвд эрүүл мэндийн үзлэг, шинжилгээнд хамрагдан, эмчийн дүгнэлт авсан байх шаардлагатай.
Үүнд анхаарах зүйл нь эрүүл мэндийн төвийн оочир, дараалал их байдаг учир эмчийн дүгнэлтийг авахад их цаг авах эрсдэлтэй. Ийм учраас эмчийн үзлэгийг урьдчилан тооцоолж, цаг захиалах шаардлагатай бөгөөд ингэснээр хугацаандаа амжиж материалаа өгөх боломжтой болно.
5. Оршин суух үнэмлэх авах
Хамгийн сүүлийн шат буюу оршин суух үнэмлэх авах шатыг танилцуулъя.
Үүний тулд Уригч байгууллага нь гадаад ажилтны цээж зураг, пасспортын хуулбар, албан хүсэлт /үүнд үйл ажиллагааны чиглэл, уригдагч иргэний Монгол улсад ямар төрлийн оршин суух зөвшөөрөл хүсэж байгаа болон Монгол улсад байх хугацаа зэргийг дэлгэрэнгүй дурдсан байх/ бүрдүүлэн, Гадаадын иргэн, харьяатын газарт цахим системээр илгээх юм.
Уригч байгууллага нь уригдагч иргэнийг Монгол улсын хилээр орж ирснээс хой
ш хуанлийн 21 хоногт багтааж, оршин суух үнэмлэх авах хүсэлт гаргах шаардлагатай.
6. Зардлууд
Ийнхүү дээрх бүх шатны ажилд нийт хэр хэмжээний зардал гарах талаар авч үзье.
Урилга авах үйлчилгээний хураамж 30,000₮
Визийн зөвшөөрөл авах үйлчилгээний хураамж 2,500₮
Виз даруулах үйлчилгээний хураамж 5$ + Энгийн нэг удаагийн орох визийн төлбөр 45$
Хөдөлмөр эрхлэх үндсэн зөвшөөрөл авах үйлчилгээний хураамж 30,000₮ + ажлын байрны төлбөр 1,584,000₮
Оршин суух зөвшөөрөл авах тэмдэгтийн хураамж 135,000₮ + Үйлчилгээний хураамж 7$
Дээрх тооцоолол нь хамгийн багаар буюу нэг гадаад иргэнийг энгийн хугацаанд зөвшөөрөл аван, 1 сарын хугацаанд Монгол улсад ажиллах хугацаанд гарах төлбөр бөгөөд нийт 1,781,500₮ + 57$ болно.
Үүнд хугацаа хувьд яаралтай эсэх, уригдагч гадаад иргэдийн тоо, Монгол улсад ажиллах хугацаа, улсын хил нэвтрэх давтамж зэргээс гарах зардал нэмэгдэх юм. Мөн үүнээс гадна нотариатаар бичиг баримт хуулбарлуулах, итгэмжлэл хийлгэх, баталгаат орчуулга хийлгэх, замын зардал гэх мэт өөр бусад зардлууд гарч болохыг анхаарна уу.
7. Хугацаа болон торгууль
Хөдөлмөр эрхлэх урьдчилсан зөвшөөрөл буюу Урилгыг 3 сарын хугацаагаар олгох бөгөөд тус хугацаанд гадаад ажилтантай хөдөлмөрийн гэрээ байгуулж, гадаад ажилтны хөдөлмөр эрхлэх зөвшөөрөл аваагүй нь хүндэтгэн үзэх шалтгаантай бол нэг удаа 3 хүртэл сараар сунгах боломжтой. Үүнд торгууль байхгүй бөгөөд хугацаа дууссан тохиолдолд дахин шинээр хандаж Урилга хүсэх шаардлагатай.
Визийн зөвшөөрөл авсны дараа 60 хоногийн хугацаанд хүчинтэй байх бөгөөд энэ хугацаанд багтаж виз даруулна. Үүнд торгууль байхгүй бөгөөд хугацаа дууссан тохиолдолд дахин шинээр Визийн зөвшөөрөл авах шаардлагатай.
Уригдагч иргэнийг Монгол улсын хилээр орж ирснээс хойш хуанлийн 21 хоногт багтааж, оршин суух үнэмлэх авах хүсэлт гаргах шаардлагатай бөгөөд 21 хоногт багтаж хүсэлтээ гаргаагүй тохиолдолд Зөрчлийн тухай хуульд заасны дагуу хугацаа хэтрүүлсэн хоног тутам 10,000 төгрөгөөр торгоно. Энэхүү нийтлэлтэй холбоотой дэлгэрэнгүй зөвлөгөө, мэдээллийг авахыг хүсвэл та манай доорх хаягаар холбогдоорой.
E-mail: contact@akp.mn Tel: 7704-1414